• Accueil
  • > Recherche : pwezi sou lanmou
( 11 octobre, 2016 )

kòk MÒ

Kòk Mò 

Tan fele

Lòsyè mo # 6

GWOUP FLÈ AK PWEZI

Sou direksyon Jn Verdin JEUDI (TOLI)
 
11 oktòb  2016

 

Pwezi se kiyè bwa, li pa pè chalè mayi cho lide pou l antre ladan l. se nan lide sa a 6èm nimewo lòsyè mo sa a ekri. Se ekspresyon solidarite yon gwoup powèt eksprime ak viktim ouragan Matthew ki sakaje peyi a 3 ak 4 oktòb ki sot pase a. chak mo yo pote kè yo nan men devan katastwòf natirèl sa a.

Kòk Mò se kontinyite pwojè « lòsyè mo » gwoup la genyen, ki vize marande plim divès ekriven ansanm epi konstwi yon gwo mo sou yon tèm espesifik, malgre chak ekriven sa a yo gaye nan tout kwen nan peyi a.

Nou pa janm bliye raple pou lektè yo, chak ti moso tèks se yon sengilarite ki marande ansanm pou konstwi totalite zèv la.
Jean Verdin JEUDI (Toli)

 

 

Lapli kriye

Pase rèl lavi,

Dlo dyòl li menm

Mouri mò moun saf

Mò rèd

Pase tibo

Timoun piti van toufounen

Epi tout rèv

Kanyank kanyank

Pase lavant machann siwo.
R. Deewoy DESROSIERS (Dee)

 
Map pase rèv mwen  solèy

Sou galata lavi

Pou m pa kite bave move tan

Fè l kale plichon
Sapphir MOISE (Sassou) & Toli

Gwo van pran vante

loraj ap gwonde anba gòj soutyen lavi

Lapli byen fò ap tonbe

Dlo krache labou

Pran  souse tete l

Van gaye chive vil la byen gaye

Jn Papite Debrosse (vers rimé)
Bip bip

bèp bôp

kè m pa sipsann dyaloge ak zegwi revèy la

yon koze

yon ripòs

yon ti twokèt kapon chita sou tèt chajè  m

Ti lapli Gonayiv

se lanmè l akouche

ou kwè ti bagay jalouzi  komè jàn  lan

Ta vin mouye kabann nou ankò

Ti kris

 

La vi isi

Se tankou yon mòso zèl ravèt

Lan bèk ti zwazo
Peter Cénas

 

Se ak pousyè pye w cheri

M anvi ekri yon powèm

Se ak pousyè pye w

M anvi  poudre listwa m

Men, van ak lapli egzile

tout mak  pye w

Selmy Accilien &  Jean Verdin Jeudi

 

Granchimen se kote

Avni nou dòmi pye san lave

Fatra leve fimye

Nan rèv timoun lakay.
Selmy ACCILIEN
Lòt bò chimen an

Mwen kanpe

M ap koupe  lakou a kout je

Si sèlman tèren an te ka bèl

Timoun nou ta pral pwomennen

Tou lè jou
Christopher JASMIN (Né d’Hier)

 

Peyi m

Sou do

li anbreye

Sou dan dèyè

Chak souf

Son rèl mizè

Chak gade

Son pikad san bonè

Alòs, Mizè peyi m se pa m

Baye peyi m se pa m

Pa gen eskonbrit

San blese

Ni kòkòday

San rache pwèl.
R. Deewoy Desrosiers (Dee)

 

Gen mouri

Gen peri

Men ayiti

Sa pa nan batistè w

Kite van lespwa vante

Kòmkidire

M te pot souf ou

Anba yon filang zetwal
R. Deewoy Desrosiers (Dee)

 

Ri non

Ri m byen van

Mak kout zong ou

Ret tou vivan

Nan machwè legzistans

Ou pa ta di sikatris

kafondi cho

Chichadò peze nan lespri restavèk
Jean Verdin Jeudi (Toli)
Tan vire

lanvè

anpil je

pèdi popyè

nyay se

chapo

sou gran rivyè.

 

Samuel CLERMONT (Diamant Noir)

 

Lè w pise

Nan kabann

Bon bondye k ap siveye

Pou pise w pa bwote w
Tilus STEEVENSON

Van

Se wonf agawou

lapli

se pise simbi

lavalas

se kout estènen

papa bondye.
Samuel CLERMONT (Diamant Noir)

 

Solèy bwè dlo

Nan tou wòch lespwa n

Chagren lavi neye po je n

Pou fènwa fè bras

Nan soufrans nou.
Marc Louverture

 

Van kouri

Kou moun fou

Mande kote l ap bout

Lè w mande zetwal

li di w li bwè pwa
Selmy Accilien

 

Syèl la pandje m tèt anba

Bay lapli pise nan nen m

yon ti pye bwa dchenn

pase men nan kou m

li di m lavi bwa ak moun se yon chenn
Christopher JASMIN (Né d’Hier)

 

Van an tonbe fè

Laviwonn sou plim je w

Pa ret branch bwa ki kwoke

Pa rete anyen sou tè

Sa m wè se yon lo fèy vèt

Pesonn paka achte
Christopher JASMIN (Né d’Hier)

 

Vil yo

Ap bwè dlo

Lonbrik yo

ap mouri

Swaf dlo

Leta menm ap teke mo
Tilus STEEVENSON

 

Woch lanmè

Bouyi

Loray gwonde

lavi ponpe

Lakansyel  pyafe

Lanmò Kreve lobidjèt peyi m

Ak yon grenn dwèt lapli
Perle Noire

Vil yo sanzabri

Gout pa gout van

Bwote lespwa n.

 

Anvan solèy lave je

Lanati te gentan ap kriye san

Pou malè pandye sou tèt vil la

Vil la kouche sou do

Ap rete tann manzè lapli

Bwote Rèv li pote ale nan peyi pèdi.

Wincy LINDOR (Univers de  Mot)
 

Bwote van

Souflete sa w jwenn

Make kay la

Make tè a

Make bounda kèk tèt mòn

Leta a resi met pantalon
Christopher JASMIN (Né d’Hier)

Van

lapli

loraj

zèklè

se twoubadou

fèy twonpèt.
Samuel CLERMONT (Diamant Noir)

Move tan

Fè w tann tanga w

Nan gran chimen

Men, rigòl dlo

Pa bezwen kouri bri lanmò

Nan endispozisyon pye wozo
Jean Verdin Jeudi (Toli)
Lespwa tann

Sou figi  timdanm  sila a,

Rèv li kwoke

Nan tche wòb lanmò

K ap  fè l grimas
Saraphia MOISE (Sassou)

 

Yon lavalas dlo pase tcheke m

Rapousib mwen rive nan letan

Manman m kwoke sou yon pye kokoye

Yon ti frè m atè.

Sa m pa fè nan letan

Ti pyès kay la fè l nan lanmè

Christopher JASMIN (Né d’Hier)
Ti kle monte

ti kle desann

tout rèv al lobeye

nan didan lanmè
Samuel CLERMONT (Diamant Noir)
Lanmè soufle bouji

Nan pye kalbas van

K ap bwote tout rêv kòmè

Lavi

vann manzè lanmò

kay chanpwèl gwo midi

Tankou pwason

kap gouye lavéy Vandredi

Anba onondipè Lavi
Perle Noire

 

Matye pichkannen syèl la

Lapli tonbe

Sou do peyi n

Jeneral lanmò kouche

Ap gade souf kretyen

K ap fofile glise nan twou panno
Feguerson (Fegg)
 

Ti kwen

syèl pa chich

latè tifle

ak graten.

Samuel CLERMONT (Diamant Noir)

 

syèl la baye

kivèt peyi m

plen ragagann

tout chen bwè dlo nan nen

bave syèl la glise desann

lage tout vye vlen

sou biskèt site a.
witchel AZOR ( chelot 1503)

 

Tan an fele

anba bounda

tout goutyè

santi lanmò.
Samuel CLERMONT (Diamant Noir)

Kè m tann

lòt bò lantouray

sou yon pil rèv

tanpri Diva

dekwoke l

ploye l

fourel nan pa w

pou  move tan

pa angoudi lanmou nou
Diamant noir & Toli

 
Lis patisipan yo
- Christopher JASMIN

- Feguerson

- Jean Papite Debrosse

- Jean Verdin Jeudi

- Marc Louverture

- Perle Noire

- Peter CENAS

- R. Deewoy DESROSIERS

- Samuel CLERMONT

- Saphire MOÏSE S

- Selmy ACCILIEN

- Tilus STEVENSON

- Tikris

- Wincy LINDOR

- Witchel AZOR

 

( 30 août, 2016 )

Kaye souvni

fichier pdf Kaye souvni, lòsyè mo#4

Kaye souvni

 

Lòsyè mo # 4

 

GWOUP FLÈ AK PWEZI

 

Sou direksyon Jean Verdin JEUDI (TOLI)

29 Dawou 2016

 

Souvni mare sosis li ak rèv nan kadans legzistans. Kaye souvni se kout zong divès otè gwoup Flè ak pwezi pou filange po imaj ak senbòl nan yon batay powetik.

Travay sa a se katriyèm piblikasyon ki soti nan pwojè « lòsyè mo » gwoup la genyen. Yon pwojè ki vize marande plim divès ekriven ansanm epi konstwi yon gwo mo sou yon tèm espesifik, malgre chak ekriven sa a yo gaye nan tout kwen nan peyi a.

N ap toujou souliye pou lektè yo, chak ti moso tèks se yon sengilarite ki marande ansanm pou konstwi totalite zèv la.

Jean Verdin JEUDI

 

Mwen sèl espektatè

Lavi m

K ap

danse

Ak yon

Moso

Lonbray

mwen
Sarapphina MOISE (Diva)

 

 

Lavi bloke sou pòtay

Sole ap fawouche

Mezi lanvi

K ap flannen

Sou pwent kè m

Monte desann

Koukouman

Tout Plim ki nan je m

Tout vil la

Desann anba plan pye m

Nan siveye lonbray poto
Mendiny JOSEPH (Larim)
Cheri

M bouke

M vle poze

Sou po vant ou

Pou m sispann mache

Dèyè lonbray ou…

 

Joh-Anna Pierette (Anna)

 

 

Cheri

Pa di m

Ou renmen m

Gade m pito

M a va konnen

Jan lanmou n tòde

Lakansyèl

 

R. Deewoy DESROSIERS

 

 

Yo di m paradi

se

nan syèl

Pou mwen

Paradi

se

Nan bouch ou

 

Snayder PIERRE LOUIS (Snaypi)

 

 

Chak branch

Pwèl ou raple m

kout grif yon djèt

Bliye nan plan men

yon ti nyaj.
Samuel CLERMONT(Diamant Noir)

 

 

Cheri

Ou mèt banm

Tout pawòl

Pawòl lanmou

Pawòl moun fou

Pawòl kwa manman Kwa papa

Pawòl pise lalin

Pawòl ki pou

Fè vwa w fè tolalito

Nan zorèy mwen

Ti cheri

Chan pwèl ou

Parèy ak zèb ginen

Men se avèk yo

M wete kras

Nan dan lavi m

 

Mendiny JOSEPH (Larim)

 

 

Anvi m

Se tipousyè ki Kache

Nan tou lonbrit ou

Anvi m

Se kras ki fè pil

Nan rigòl tete w.
Pa frote kò w cheri

Pa benyen dri cheri

Pou pa voye anvi m ale.

Cheri

M swaf

prezans ou

Ban m ti

gout krache

 

Mendiny JOSEPH (Larim)

 

 

W a eskize m cheri

Si lè w pa la

M pa fè revèy konfyans

zegwi tan m

Ret nan pwent tete w

Stevenson TILUS

Lè w la cheri

Tout gran ri

Pèdi kliyan

Je tout moun kwoke

Nan gade w

 

Stevenson TILUS
M ap chache prezans ou

Miyèt souri w fè m paka dòmi

Li anpeche m jwenn

Sole klere

Se dife je w ki flanbe kè m

Nan yon ti kadè

 

Sandy NORMIL (Sandouella)

 

 

Bann chanpwèl

Mare chimen m

Pagen wout pa bwa

Sèlman

Anba ti vant ou

 

Mendiny JOSEPH (Larim)

 

 

Cheri kite m tete lang ou

Pou m pa janm grangou

Kite m navige

Sou po vant ou

Pran m, mennen m ale

Kote rèv se tibato papye

Selmy Accilien

Yo dim lari se salon pèp

Ou met kwè m

Se kè w cheri

Ki ni salon ni chanm

 

Snayder PIERRE LOUIS (Snaypi)

 

 

Sou fèy mwen

M ap montre w

Deplimen lavi

Konsa la sipann

Flannen
Sarapphina MOISE (Diva)

 

 

M anvi pare solèy

Anba fèy ou

M anvi tire nago

sou do kay ou

M pran sant frensay ou

Chak mo w yo

Se yon senk kòb

Anba lang lakansyèl

Ti kris

Sou chimen w

Sèlman m vle pase

Pou m pa pèdi tras pye w

Nan mare lapli anba ti Vant ou

 

Eland GUERRIER

 

Jalou pa jalou

Anyen pa ka separe n

Paske lanmou n

Pyese ak krache lesyèl

 

Mendiny JOSEPH (Larim)

 

Nou tout gen menm laj

Nou menm longè

Al mande lanati la di w

Se sou pwent tete l

Nou te fèt ansanm

 

Snayder PIERRE LOUIS (Snaypi)

 

Depi bajou kase

M koumanse priye

Pou lanjelis rive

Pou m ka goute souvni

Lanmou w pote
Joh-Anna PIERRETTE (Anna)

 

Mwen menm

Jenn powèt devègonde

M ap fwenk ekri non m

Nan do seren lapli

Pou lakansyèl

Ka konn kòman m rele
Selmy ACCILIEN

 

Kenbe m

Mare m

Kwoke m

Pou m wè uityèm

Koulè lakansyèl

K ap bwè dlo

Nan fon kè w
Joh-Anna PIERRETTE (Anna)
Lapli se bòt move tan

Mete nan pye l

Pou l mache

Sou latè.

 

Selmy ACCILIEN

 

Zetwal kouve

Fè timoun pa grandi
Selmy ACCILIEN

 

 

M ap priye

Sou chak fèy

Pou se figi w m ekri

Lè enspirasyon m

Chache w toupatou

M a kouri nan vwa w

Jouktan m bouke koute l
Casanova

 

 

Cheri absans ou

Leve raje sou kè m

Souvni n

Pouse zepon

Nan figi tan

 

Eland GUERRIER

 

Souvni mwen ak ou

Mare nan Zetwal

K ap klere

Sou mòn lanmou
Joh-Anna PIERRETTE (Anna)

 

 

Kou l fè minwi

Lespri m panche a goch

Li al kabicha

Sou pòtray lanmou nou

 

Jean Verdin JEUDI (Toli)

 

Cheri

Tout renmen

Se renmen

Men ann tann

Lanjelis pwente

Pou renmen n jwe

Lago deli
R. Deewoy DESROSIERS

 

Plan men m vid

Kou ponyen razè

Ki sot nan pòch renmen

M akwoupi devan pa pòt ou

Tout san m tresayi

Nanm mwen vòltije

Sèl kò m wa va jwenn

Kòm yon dènye soupi
Christopher JASMIN (Né d’Hier)

 

De ti zwazo branche

menm pye bwa

Yon bèl mizik pran siyonnen

Galri kay la

Tout batanklan nan kay la

Pran danse

Poutan ou rete la

ap fè m grimas

Kou madigra legede

 

Christopher JASMIN (Né d’Hier)

 

M achte vag lanmè

Mete nan kè m

Pou tout bras ou

Pa al pi lwen ke fwontyè

zye m

 

Stevenson TILUS

 

 

Absans ou sizonnen kè m

Larivyè zye m

Trennen souvni n

Anba tye wòb lanmè

Sou chimen lespwa
Eland GUERRIER

Lè lougawou met pye,

nan fwaye nou

M a pete koken

Sou plato vwazinay
Christopher JASMIN (Né d’Hier)
Depi m piti m ap teke mab

Ak lanmou

Mwen nik kwaze w

Boulpik mwen mò

Nan wonn kako w

 

Jean Verdin JEUDI (Toli)
Ayè reswa

M bare vigil ou

K ap fè pwezi m je dou

Pale l tande

Lonbray li tou flègèdèk

Kakòn figi l deboutonnen

Kouwè move zè

Anvan l jou

 

Schadmael DEROSIER (L’indocile)

 

 

Lè m avè w

fil lavi m Pèdi

nan alsiyis Ou

Kè m pran latranblad
Schadmael DEROSIER (L’indocile)

 

 

Nan latchè w gen yon mizik

ki ensite m kanpe

pou selebre lamès

sou lotèl ou

plezi m

se manje kò w

bwè san w

pou kominyon foli nou

 

Ti kris
Mouche van

Si w wè souvni pou mwen

Di li pati

ak yon gwo

pati nan mwen

di l pou mwen

solitid se dra

ki vlope m

Epi dlo je m

rive anba kou m
O! van

Si w wè SOUVENI

Pou mwen

Ou va di l

vil la ap plenyen

pou mak Pyel

di li pou mwen

popyè m kouri kite m

 

Samuel CLERMONT (Diamant Noir)

 

 

Lis patisipan an yo:

 

- Casanova

- Christopher JASMIN

- Eland GUERRIER

- Jean Verdin Jeudi

- Joh-Anna N. PIERETTE

- Mendiny JOSEPH

- R. Deewoy Desrosiers

- Samuel CLERMONT

- Sandy NORMIL

- Saphire MOISE S.

- Schadmael DEROSIER

- Selmy ACCILIEN

- Snayder PIERRE-LOUIS

- Tilus STEVENSON

- Ti kris

( 16 août, 2016 )

Tak san kè

TAK SAN KÈ

fichier pdf Tak san ke, losye mo-2

Lòsyè mo  # 2

GWOUP FLÈ AK PWEZI

Sou direksyon Jean Verdin JEUDI (TOLI)

16 Dawou 2016

 

 

“Tak san Kè” se plizyè moso mo divès otè ki nan gwoup Flè ak pwezi” chwazi kole ansanm pou eksprime yoparapò ak delabreman sou tout fòm ki ap sakaje peyi Ayiti.

Travay sa a enskri nan pwojè « lòsyè mo » gwoup la genyen, ki vize marande plim divès ekriven ansanm epi konstwi yon gwo mo sou yon tèm espesifik, malgre chak ekriven sa a yo gaye nan tout kwen nan peyi a.

N ap toujou souliye pou lektè yo, chak ti moso tèks se yon sengi-larite ki marande ansanm pou konstwi totalite zèv la.

Apre “Zensèl Lanmou”, zèv sa a tradui ankò puisans men kontre genyen nan aboutisman yon lide.  

Jean Verdin JEUDI

 

 

Mwen anvi w

Anvi w pete de je m

Pou m pa gade

Lanati kap chare

Gouyad ou…

 

R. Deewoy Desrosiers (Dee)
vil la se batanklan riyèl paka pote

pil fatra se lòlòj kap kalkile

pete lanwit

vil la bliye limyè l

Anba yon asyèt blan

Ak lwil maskreti san bòkò.

 

vil la kase koub

vil la talonnen lonbray li

vil la krache nan pise l

zonbi l aladriv.

 

Diamant Noir

 

 

Leta pòtre kadejakè

K ap bay la lwa dwèt.

 

Roberto HECTOR ( Casanova)

 

 

Nou pale

Yo pale

Pale nap pale

 

Nou ale

Yo ale

Ale nou prale

Ayiti son peyi

K ap pale

Pou ale

 

Tilus Stevenson

 

 

Se pa mwen ki pou di w

ki pi gwo kadejakè

ki pase sou po trip Ayiti

Si w vle konnen

Al mande pou endyen yo

 

pa atann m ap vin di w

ki tretman yo bay nèg

K ap batay pou libète

Si w vle konnen

Al mande defen

Boukman ak Peral

 

Jean verdin JEUDI (Toli)

 

 

 

Pinèz pa pikan

Chita chita w

Pou koute

van lamizè

Ti malere  se chen

Boujwa se respè

 

Mendiny JOSEPH (Larim)

 

 

Gad de selera

vil la pran

Nan fo mamit

Kapital la se ravinn

Pou chyen piyajè

Ak Kochon  raboure

 

Sapphire MOISE

 

 

Yo di m vil yo chaje moun

Men souri w gen sèl mwen

Li se sèl vil kote

Rèv mwen ap flannen

Ak wòb lamarye
Snayder PIERRE-LOUIS (Snaypi)

 
Vroum!

Vroum!

Mouche Leta

Pa konn Blokis

Leta anlè

Leta atè

Sèl sovè w

Se ba l pase

Gwo nèg

Ka toujou Leta

Men bal mawon

Se polis kouche
Roberto HECTOR ( Casanova)

 

 

Chen jape

Menm lapriyè midi

Solèy la cho

Kou yon vè lanp

Se kòm si nan  peyi m

Mond lan rive nan bout li
Né d’hier

(Pou Kastwo k ap selebre 90 rekòt kafe)

 

Lòt bò zile

Gen yon gwo pye mapou

Kadans fèy li

Tranble 4 kwen latè

Nan pwen twou

Pou Koulèv vin kouve

Sou dinyite mounite

Yon gout tafya pou Desalin

Yon gout pou kapwa

Boutèy rezistans lan

Pa janm sispann koule

 

Jean Verdin Jeudi

 

 

W ale

L ale

Y ale

N ale

Nou pòtre yon

Kolonn bèt san mèt

Patiraj nou kraze

Nou bliye rasin nou,

 

Ganaël ESPRIT-SAINT

 

 

Vini nou fè pla men cho

lalin bò isit

Gen zanpoud

Peyi m kwoke

Nan zak zotobre

Peyi m kanpe

Li leve, li gouye

Li mache, li ale……
Né d’hier
Diyite n

Pèdi fren

Sou chimen

Lipokrizi

 

Diyite n

Pran pwomennen

San nanm

San vi

San lespwa

Jouktan pye l

Pati kite n

 

Roberto HECTOR ( Casanova)

 

 

Kè m pa sote

Lè fènwa

kenbe lonbray mwen

Pito nou mare dizon nou

Pou n konn kote

N ap kontre

 

Tilus Stevenson
Towo pou towo

Lonbray nou

Gen pou mare

Pou yo konfonn

Yon jou kanmèm
Mendiny Joseph (larim)

 

 

Y ale

Ginen yo ap soufri

Simbi pèdi vwa l

Nan yon rèl

san bout

 

Ganaël ESPRIT-SAINT.

 

Nan fènwa nou manje

san kè sote

san lodyans.

 

Nan fènwa nou danse

san rit, san son

Nou kadanse

Jis pye n poudre

Nou menm bliye

Si nou  te kontre

Ak lalin bò lanmè nan solèy.

 

Eland GUERRIER

 

 

Mwen vle promennen rèv nou

Anba tout

Lawouze

Pou yo taye banda jis

chalè solèy fè batba.

 

Kite m

konte listwa n

Anba tout kalbas gran chimen

Jis mèt kalfou bèbè

 

Eland GUERRIER

 

 

Tè Ayiti

Se tè ki rale foumi

Tout  montay

Gen lanbisyon karese syèl

Satiyèt bondye ak bèlte l

Se yon Tè ki kanpe dwèt

devan tout lòt

 

Tilus Stevenson

 

 

Gade non

Leta peyi n

Se chans pete zandolit

Sou tèt malere

Se yon mizik

San vwa

San pawòl

Van bwote al jete

Sou do lanmè

 

R. Deewoy Desrosiers

 

 

potoprens se yon vil

ki pòtre fanm

kap konte riyèl

soti depi gran ri

Al bout sou pwent tete

peyi sapat

Tout kadav antere

Nan kilòt

vil la angoudi nan bous

 

Diamant Noir

 

 

M ap mache

Ak yon patalon

Fouk chire

M pa bay lari

Pote anyen pou mwen

Leta li menm

Toutouni

 

Tilus Stevenson

 

 

Tè dayiti

Se tè mawon

Deyè chak grenn

Jèn

Leta limen

Yon lanp tèt anba

Pou n kite l vòlè

An pè

 

M pa anvi ale

Men si m ale m p ap tounen

M pa anvi pi leta

Ke leta

 

Tilus Stevenson

 

 

Ayiti cheri

Move lavi p ap

Fè m voye dlo deyè w

Nan tout kalfou

Map fè liminasyon

Pou Kwape move lawon

Move lang

Lang dyòl pagou

Lang move zè

 

Eland GUERRIER

 

 

Lis patisipan yo

 

- Diamant Noir

- Eland GUERRIER

- Ganaël Esprit-Saint

- Jean Verdin Jeudi

- Mendiny JOSEPH

- Né d’hier

- R. Deewoy Desrosiers

- Roberto HECTOR

- Saphire Moïse S

- Snayder PIERRE-LOUIS

- Tilus Stevenson

( 5 août, 2016 )

ZENSÈL LANMOU

 

ZENSÈL LANMOU

 

 fichier pdf zensel lanmou

 

GWOUP FLÈ AK PWEZI
Sou direksyon Jean Verdin JEUDI (TOLI)
4 Dawou 2016
Lè mo ak mo kole tèt, tout lide vin lejè tankou pay ».
Zensèl lanmou se yon inisyativ yon ansanm ekriven ki nan yon gwoup literè ki rele « flè ak pwezi ». ekriven sa a yo gaye nan tout kwen peyi a, pifò nan yo pa janm kwaze fas a fas. Yo pati ak lide pwezi kapab envante pwòp mond pa li pandan li ap eksplwate materyèl le-gzistans powèt la.

Konstriksyon sa a fèt apati yon retay pwezi nou seleksyone nan piblikasyon ekriven yo fè sou gwoup la, ki an kreyòl epi ki pale de lan-mou. Se yon fason pou nou souliye pou lektè yo, yo dwe konsidere chak ti moso tèks kòm yon sengilarite ki marande ansanm pou kons-twi totalite zèv la.

Jean Verdin JEUDI

Ou pòtre lalin
Ki jouke douvanjou
K ap fè je sole
Fè Jalouzman

Si chak grenn mo
Ki tradui bote
Te ka pale
Pòtre w t ap yon liv
Ki chaje
Ak tout kalte pawòl
Ki pou fè Bondye
Chanje sèks

Marckenson Mathurin (Marc Louverture)

 
Cheri
Depi m wè lèv ou
Krache
Plen bouch mwen
Vini nou neye tan an
Nan yon sousad

Depi m wè bouch ou
Lang mwen pa konn
Sou ki dan poul chita
Vini non
Vini n fè yon kachkouch
Ak yon grenn sirèt

Tilus Stevenson & Ganaël Esprit-Saint

 

 

Map file bèlte w
Latranblann
Pran m tout nan dwèt
Epi m ap jofre
Nòs mwen avè w
Sou fil yon rèv
San lin-de-myèl..

R. Deewoy Desrosiers (Deewoy)

 
Tonnè boule m
Jou m jwenn
De fanm tankou w
M’ap pran kriye
Pou tantasyon sote tèt mwen

Christopher Jasmin (Né d’hier)
Nan ale vini lan nwit
Nan tou somèy
Mwen kwaze lalin
kap goumen ak soléy
Fè nwa pete je m pou m pa wè
Jan pye lalin lejè
Li ka koupe jouk li kase bajoul

Witchel Azor (Chelot)

 
Vlope kè m nan tche wòb ou
Pou swè kò w
Gwosi lanmou m

Jean Verdin Jeudi (Toli)

 
Bèlte w kreve je douvanjou
Pa di m devègonde
Si zetwal yo depoze m
Devandèyè sou tèt djyòl ou.
Si santiman m ta mare
Nan kòd lonbrit ou.

Selmy Accilien (Seldjy)

 
Cheri
Padone m
Si w wè beze m pa mouye
Pa kite jalouzi sivoke w
Se pa lòt bouch ki prije l

Tout dlo nan djòl mwen

Pase nan benyen

Timoun lari

 

Toli

 

Pou ou kapab li rès tèks yo, telechaje dokiman pdf la

( 17 mai, 2016 )

Pwomnad

Solèy la annik fin jouke bwa
Lanmou nou al gaye,
Nan je zegwi nou fofile
Devan je granni,
Pase nan koridò payas
Tonbe sou boulva Desalin
Nou pral boukante rèv
Piye lanbisyon
Dèyè do poto limyè Channmas.

Nan trese cheve lannwit
Ak pwèl je nou
Men nou pran bandezon
Yonn ap fè palisad sou kò lòt
Ou pa ta di zandolit sou fèy bannann.

(Lòsyè pwezi pou granni)

( 30 décembre, 2014 )

Jwèt nan pwezi

Mwen jwe poum pa dejwe,

Mwen fè jwèt poum pa pèdi tèt

 Nan tete dwètPas de droits sur l'album

Mwen jwe ak pwezi

Pou m tchoula lavi,

Adousi gèp ak lapawoli,

Soule foli, Andòmi dezi

Poum pa pèdi

Nan fofile pase nan je zegwi

Poum al bouske lanfè ak paradi,

Lèm konnen lanfè pa twò lwen bò isit

Mwen pap jwe poum pèdi,

Tout sa lòt moun pèdi

Mwen mete yo nan pwezi,

Mwen jwe ak pwen, ak vigil,

Mwen jwe ak pwen vigil

Mwen met aksan, menm sil grav l’ap pran fòs

Mwen fòse laverite fè pòs

Nan seremoni lide kap fèt nan salon ekriti

 

 Mwen jwe, mwen swe,

 menm pap fatige

mwen jwe pyano, m jwe gita

m bat tanbou, m souke tchatcha

mwen chante, mwen boula

mwen boula ak madan sara

kap batay ak lavi poul kenbe wòb lespwa

mwen sote kòd ak ti fifi ki gen  lamizè kòm sèl espwa

 teke mab ak timoun bò anba

kap kenbe mouch, manje tèt jete mmda

Kite m jwe poum pa kriye

chak grenn mo se tankou yon gout dlo ki tap tonbe

menm si yo di granmoun pa jwe, kitem jwe

paske se yon jwèt ki pa jwèt, sew jwèt serye

 menm si  chen an grangou, lap vin jwe.

Mwen jwe ak pwezi

Poum’ met lavi toutouni

Lonje men bay tout sa ki vle febli

Mwen jwe ak pwezi poum pran gou lanmou

Nan lang nou, nou fè lanmou

Lèm di gita, m di tchatcha, li pa mizik men se lanmou

 

Mwen jwe poum pa dejwe

Mwen jwe, mwen swe, menm pap fatige

Mwen jwe ak pwezi poum tchoula lavi

Jwe ak lèt ak pawòl poum di sam santi

 

 

TOLI

|